ಬಚ್ಚಲಲ್ಲಿ ಎಲ್ಲರೂ ಬೆತ್ತಲೆ !

ಒಲುಮೆಯ ಕೂಟಕ್ಕೆ ಯಾವ ಅಪ್ಪಣೆ ಬೇಕು ?

ಮನುಷ್ಯ ಹಾಗೂ ಪ್ರಾಣಿಗಳಿಗೆ ಹೆಚ್ಚು ವ್ಯತ್ಯಾಸವಿಲ್ಲ. ಆದರೆ ಕೆಲವು ವಿಷಯಗಳನ್ನು ಮನುಷ್ಯ ಗೌಪ್ಯವಾಗಿ ಇಡಬಲ್ಲ. ಯಾರಿಗೂ ಗೊತ್ತಾಗದಂತೆ ಮಾಡಬಲ್ಲ. ಸುಳ್ಳು ಮೋಸ ವಂಚನೆಗಳನ್ನೂ ಸಹ ಯಾವ- ಯಾರ ಎಗ್ಗಿಲ್ಲದೆ ನಡೆಸಬಲ್ಲ. ಕೊಲೆಯನ್ನು ಮಾಡಿಯೂ ಮಾಡದಂತೆ ಮುಖವಾಡ ಹಾಕಬಲ್ಲ. ಅತ್ಯಾಚಾರ ಮಾಡಿಯೂ ಏನೂ ಮಾಡಿಲ್ಲವೆಂದು ಸೋಗು ಹಾಕಬಹುದು. ದರೋಡೆ ಮಾಡಿ ಸಾಚಾ ಎಂಬಂತೆ ತನ್ನನ್ನು ತಾನು ಬಿಂಬಿಸಿಕೊಳ್ಳಬಲ್ಲ. ಸಾಕಷ್ಟು ಮುಖವಾಡಗಳನ್ನು ತೊಟ್ಟುಕೊಂಡ ಮನುಷ್ಯ ಆ ಮುಖವಾಡಗಳ ಮೇಲೆ ಒಳ್ಳೆಯವನು ಕೆಟ್ಟವನು ಎಂದು ನಮ್ಮ ಸಮಾಜ ನಂಬಿಕೊಂಡು ಹೊರಟಿದೆ.

ತೀರಾ ಇತ್ತೀಚೆಗೆ ನಡೆದ ಲೈಂಗಿಕ ಕ್ರಿಯೆಗಳ ವಿಡಿಯೋ ತುಣುಕುಗಳು ಹೆಚ್ಚು ಸದ್ದು ಮಾಡಿವೆ. ದೃಶ್ಯ ಮಾಧ್ಯಮವನ್ನು ಇನ್ನು ಮುಂದೆ ನಡುಮನೆಯ ಅಂಗಳದಲ್ಲಿಟ್ಟು ನೋಡುವ ಕಾಲ ಇದಲ್ಲ ಎಂದು ಸಾಬೀತಾಗಿದೆ. ಮೂರ್ನಾಲ್ಕು ದಿನಗಳಾದರೂ ಸಹ ಅವುಗಳ ಆರ್ಭಟ ನಿಂತಿಲ್ಲ. ಬಹುಶಃ ಆ ವ್ಯಕ್ತಿ ಬದುಕಿರುವವರೆಗೂ ಅದು ನಿಲ್ಲುವುದಿಲ್ಲ. ಅವರ ಹೆಸರು ನೆನಪಾಗುತ್ತಲೆ ಆ ಸಿಡಿಯ ದೃಶ್ಯಗಳು ನಮ್ಮ ಕಣ್ಣ ಮುಂದೆ ಬಿತ್ತರವಾಗುವಷ್ಟು ನಾವೆಲ್ಲ ನೋಡಿ ಆಗಿದೆ. ಸಾರ್ವಜನಿಕ ಜೀವನದಲ್ಲಿದ್ದ ವ್ಯಕ್ತಿ ಮೇಲ್ಗಡೆ ಕುಳಿತಿರುವುದರಿಂದ ಸಹಜವಾಗಿ ಆತನ ನಡೆ ನುಡಿಗಳಲ್ಲಿ ಹೆಚ್ಚು ಪಾರದರ್ಶಕವಾಗಿರಬೇಕು ಎಂದು ಪ್ರತಿಪಾದಿಸುವವರಲ್ಲಿ ನಾನೂ ಒಬ್ಬ. ಆದರೆ ವ್ಯಕ್ತಿಯೋರ್ವನ ಖಾಸಗಿ ಬದುಕಿನಲ್ಲಿ ಹೊಕ್ಕು ಆತನನ್ನು ಸಮಾಜ ದ್ರೋಹಿ ಎಂದು ಬಿಂಬಿಸುವ ಅಧಿಕಾರವನ್ನು ಯಾರು ಕೊಟ್ಟರು ?

ಲೈಂಗಿಕ ಕಾಮ ಕೇಳಿಯಲ್ಲಿ ಭಾಗಿಯಾದ ವ್ಯಕ್ತಿಗೂ ಹೆಂಡತಿ ಮಕ್ಕಳು ಬಂಧು ಬಾಂಧವರು ಎಲ್ಲಾ ಇದ್ದಾರೆ. ಅವರೆಲ್ಲ ಮನಸ್ಸು ಎಷ್ಟು ಕುಗ್ಗಿ ಹೋಗಿರಬಹುದು. ಯಾರೋ ಮಾಡಿದ ತಪ್ಪಿಗೆ ಇನ್ನಾರಿಗೋ ಶಿಕ್ಷೆ ವಿಧಿಸುವುದು ಸರಿಯೆ ? ಇಷ್ಟಕ್ಕೂ ಬಹುತೇಕ ವಿಡಿಯೋಗಳನ್ನು ನೋಡಿದರೆ ಸಂತ್ರಸ್ತೆಯನ್ನು ಒತ್ತಾಯದಿಂದ ಮಂಚಕ್ಕೆ ಎಳೆದಂತೆ ಕಾಣುತ್ತಿರುವುದಿಲ್ಲ. ಒತ್ತಾಯವಿಲ್ಲದ, ಪರಸ್ಪರ ಒಪ್ಪಿಗೆಯಿಂದ ನಡೆದ ಲೈಂಗಿಕ ಕ್ರಿಯೆಗೆ ಕಾನೂನು ಸಹ ಮೌನವಹಿಸುತ್ತದೆ.

ಆದ್ದರಿಂದ ಇಂಥ ಲೈಂಗಿಕ ಕ್ರಿಯೆಯ ಹಗರಣಗಳು ಬಯಲಿಗೆ ಬಂದಾಗ ಅವು ನೇರ ಮಾಧ್ಯಮಗಳಿಗೆ ಹೋಗದ ನಿರ್ಬಂಧ ವಿಧಿಸಬೇಕು. ಅಥವಾ ಮಾಧ್ಯಮಗಳು ತಮಗೆ ತಾವೇ ನಿರ್ಬಂಧ ವಿಧಿಸಿಕೊಂಡು ಸಮಾಜದಲ್ಲಿ ಮುಂದೆ ಆಗಬಹುದಾದ ಅನಾಹುತಗಳಿಗೆ ಕಡಿವಾಣ ಹಾಕಿಕೊಳ್ಳಬೇಕು. ಸುಪ್ರಿಂಕೋರ್ಟನ ನಿವೃತ್ತ ನ್ಯಾಯಮೂರ್ತಿಗಳ ನೇತೃತ್ವದಲ್ಲಿ ಕಮೀಟಿಯೊಂದು ರಚಿಸಿ ಆ ತಂಡದ ತೀರ್ಮಾನದಂತೆ ಶಿಕ್ಷೆ ಕೊಡಬೇಕು. ಅಲ್ಲಿಯವರೆಗೂ ದೃಶ್ಯ ಮಾಧ್ಯಮಗಳು ಆ ಕಡೆ ಮುಖವಿಟ್ಟು ನೋಡದಂತೆ ತಡೆಯಬೇಕಿದೆ. ಇಲ್ಲದೆ ಹೋದರೆ ಸಾರ್ವಜನಿಕವಾಗಿ ಸಣ್ಣ ಪುಟ್ಟ ಮಕ್ಕಳ ಸಮೇತ ಮುಂದೊಂದು ದಿನ ಇಂಥ ದೃಶ್ಯಗಳನ್ನು ದಿನವೂ ನೋಡಬೇಕಾದ ಅನಿವಾರ್ಯತೆ ಸೃಷ್ಟಿಯಾಗಲಿದೆ.

ಮಠಾಧೀಶ, ರಾಜಕಾರಣಿ, ಸಾಹಿತಿ, ಸಮಾಜ ಕಾರ್ಯಕರ್ತ ಯಾರೇ ಆಗಿರಲಿ ಆತನ ಒಪ್ಪಿತವಾದ ಲೈಂಗಿಕ ದೃಶ್ಯಗಳನ್ನು ಮಾಧ್ಯಮಗಳಿಗೆ ಹಠಾತ್ತನೆ ಬಿಡುಗಡೆ ಗೊಳಿಸುವುದು ತರವಲ್ಲ ಎಂದು ನನಗನಿಸುತ್ತದೆ. ಬಚ್ಚಲಲ್ಲಿ ಎಲ್ಲರೂ ಬೆತ್ತಲೆ ಎನ್ನುವಂತೆ ಮನುಷ್ಯ ಸಹಜ ಲೈಂಗಿಕ ಕಾಮನೆಗಳು ಎಲ್ಲರಲ್ಲೂ ಇರುವಂಥವೆ. ನಾವು ನಿತ್ಯ ನಡಕೊಳ್ಳುವ ದೇವರ ಗುಡಿಗಳ ಶಿಲ್ಪಗಳನ್ನು ಕಣ್ತೆರೆದು ನೋಡಿದರೆ ಕಾಣುವುದೆ ವಾತ್ಸಾಯನನ ಕಾಮ ಸೂತ್ರಗಳ ನಗ್ನ ಚಿತ್ರಗಳು. ಶಿವ ಮತ್ತು ಪಾರ್ವತಿಯ ಸಮಾಗಮದ ಚಿತ್ರವೇ ಗುಡಿಯಲ್ಲಿರುವ ಈಶ್ವರ ಲಿಂಗ ಹಾಗೂ ಪೀಠಕ ಎಂದು ಹೇಳುವ ಒಂದು ವಾದವನ್ನು ನಾವಿಲ್ಲಿ ಗಮನಿಸಬಹುದು. ಮನುಷ್ಯ ಹುಟ್ಟಿದ್ದು ಬೆಳೆದಿರುವುದು, ಬೆಳೆಯುತ್ತಿರುವುದು ಸಹ ಲೈಂಗಿಕ ಕ್ರಿಯೆಗಳಿಂದ ಎಂಬುದು ಎಲ್ಲರೂ ಒಪ್ಪಬೇಕಾದ ಸತ್ಯ. ಹಾಗಂತ ಕಂಡ ಕಂಡವರೊಡನೆ ಅನಿರ್ಬಂಧಿತ ಕಾಮಕೇಳಿಯನ್ನು ನಡೆಸಬೇಕು ಎಂಬ ವಾದವೂ ನನ್ನದಲ್ಲ. ಎರಡು ಜೀವಗಳ ನಡುವೆ , ಖಾಸಗಿ ಕೋಣೆಯಲ್ಲಿ ನಡೆಯುವ ಕ್ರಿಯೆ ಸಾರ್ವತ್ರಿಕವಾಗಿ ಕಾಣಿಸಿಕೊಳ್ಳಬಾರದು ಎಂಬುದು ನನ್ನ ಅರಿವು. ಸಮಾಜದ ಮುಂದಿನ ನಾಗರಿಕರಾಗುವ ನಮ್ಮ ಮನೆಯ ಸಣ್ಣ ಸಣ್ಣ ಮಕ್ಕಳು ಈ ಚಟುವಟಿಕೆಗಳನ್ನು ದೃಶ್ಯ ಮಾಧ್ಯಮದಲ್ಲಿ ನೋಡುವುದರಿಂದ ಅವರ ಮನಸ್ಸಿನಲ್ಲಾಗುವ ತವಕ ತಲ್ಲಣಗಳ ಕುರಿತು ಗಂಭೀರವಾಗಿ ಆಲೋಚಿಸಬೇಕಾಗಿದೆ.

ಕಾಯ ಬತ್ತಲೆಯಾಗಿ ಕಾಣಿಸಿಕೊಳ್ಳುವ ಎಷ್ಟೋ ಮಠಾಧೀಶರೂ ಸಹ ಲೈಂಗಿಕ ಆರೋಪಗಳಿಗೆ ಗುರಿಯಾದದ್ದು ಇದೆ. ಮಂಡೆ ಬೋಳಿಸಿಕೊಂಡು ತಿರುಗಾಡುವ ಸ್ವಾಮೀ ಮಹಾಸ್ವಾಮಿಗಳೆಲ್ಲ ಹೆಣ್ಣೆಂಬ ಮಾಯೆ(ಆಸೆ)ಯ ಮುಂದೆ ಬೊಕ್ಕ ಬೋರಲ ಬಿದ್ದಾಗಿದೆ. ಮನುಷ್ಯ ಪ್ರಾಣಿಯಾಗಿರುವ ಎಲ್ಲರೂ ಒಳಗೊಳ್ಳುವ ಕ್ರಿಯೆ ಇದಾಗಿರುವುದರಿಂದ ಸಹಜವಾಗಿ ನಡೆಯುವಂಥದ್ದು. ಆದರೆ ಕೇವಲ ಮಠಾಧೀಶರು ಮಾತ್ರ ಈ ಮೋಹದ ಬಲೆಯಿಂದ ಹೊರಗಿಡುವು ತರವಲ್ಲವೆಂಬುದು ನನ್ನ ವಾದ. ಒಂದು ಸಲ ಈ ಆಸೆ ಮನಸ್ಸಿನ ಮೂಲೆಯಲ್ಲಿ ಕುಳಿತುಕೊಂಡಿತು ಎಂದರೆ ಅದು ತನ್ನ ಹಿಡಿತವನ್ನು ವ್ಯಕ್ತಿಯ ಮೇಲೆ ಸಾಧಿಸುತ್ತಲೆ ಹೋಗುತ್ತದೆ. ಸಾಧ್ಯವಾಗದಿದ್ದರೆ ಅದು ಒಂದಲ್ಲ ಒಂದು ಸಲ ಸ್ಪೋಟಗೊಳ್ಳುತ್ತದೆ. ‘ಕಾಮಾತುರಂ ನ ಲಜ್ಜಂ. ನ ಭಯಂ’ ಎಂಬಂತಾಗುತ್ತದೆ. ‘ಉಣಲೆಂದು ಬಂದ ಸುಖ ಉಂಡಲ್ಲದೆ ಹರಿಯದು’ ಎಂದು ಅಕ್ಕಮಹಾದೇವಿ ತಾಯಿ ಹೇಳಿದ್ದನ್ನು ನಾನಿಲ್ಲಿ ನೆನೆಯ ಬಯಸುತ್ತೇನೆ.

ಕಾಮವನ್ನು ತ್ಯಜಿಸಿದ ವ್ಯಕ್ತಿ ಬಹು ದೊಡ್ಡವನು ಎಂದು ನಿರ್ಧಾರಿಸುವ ಮಾಪನವೇ ಸರಿಯಾದುದಲ್ಲ. ಅದು ನಿಸರ್ಗ ಕ್ರಿಯೆಗೆ ವಿರೋಧವಾದ ತತ್ವ. ಹಸಿವು ತೃಷೆ ನೀರು ದೇಹಕ್ಕೆ ಎಷ್ಟು ಸಹಜವೋ ಅಷ್ಟೇ ಸಹಜ ಕಾಮ. ಕಾಮವನ್ನು ಗೆಲ್ಲವುದು ಸುಲಭದ ಮಾರ್ಗವಲ್ಲ. ಅದು ಕಲ್ಲು ಮುಳ್ಳುಗಳಿಂದ ಆವೃತವಾದ ದಾರಿ. ತನ್ನನ್ನು ತಾನು ಯಾರು ಗೆಲ್ಲುವರೋ ಅವರು ಕಾಮವನ್ನೂ ಗೆಲ್ಲಬಲ್ಲರು. ಆದರೆ ಇಂಥ ವ್ಯಕ್ತಿಗಳು ಇಂದು ಯಾರಿದ್ದಾರೆ ? ಎಂಬುದು ಯಕ್ಷ ಪ್ರಶ್ನೆ. ನೀರು ಕುಡಿಯದೆ, ಶ್ವಾಶೋಚ್ಛಾಸವನ್ನು ನಡೆಸದೆ, ಉಣ್ಣದೆ ಜೀವಂತ ಇದ್ದಾನೆ ಎಂಬುದು ಎಂಥ ಪವಾಡವೋ ಹಾಗೆಯೆ ಕಾಮವನ್ನು ಗೆದ್ದಿದ್ದೇನೆ ಎಂದು ಹೇಳುವುದು ಸಹ. ನಿದ್ರೆ ನೀರಡಿಕೆ ಹಸಿವೆಗಳನ್ನು ಗೆದ್ದವರು ಸಹಜ ಜೀವಿಗಳು ಎಂದು ಕರೆಯುವುದು ಕಷ್ಟ. ಇಂಥವರು ಅಪರೂಪದ ಜೀವಿಗಳು ಎನ್ನಬೇಕು. ಮತ್ತು ಅಬ್ ನಾರ್ಮಲ್ ಆದ ಜೀವಗಳೂ ಎಂದು ಹೆಸರಿಸಬಹುದು. ಅಥವಾ ಈತನಲ್ಲಿ ಎಲ್ಲರಲ್ಲಿರುವಂತೆ ದೈಹಿಕ ಬೆಳವಣಿಗೆ ಆರೋಗ್ಯ ಪೂರ್ಣವಾಗಿಲ್ಲ ಎಂದು ತಿಳಕೊಳ್ಳಬೇಕು. ನಿದ್ರೆ ಮಾಡದೆ, ನೀರು ಕುಡಿಯದೆ, ಗಾಳಿಯನ್ನು ಸೇವಿಸದೆ ಜೀವಿಸಬಲ್ಲ ಎಂಬುದು ಹೇಗೆ ಅನಾರೋಗ್ಯ ಪೂರ್ಣ ಮತ್ತು ಸತ್ಯವಿಲ್ಲದ ಮಾತೋ ಹಾಗೆಯೇ ಮೈಥುನವಿಲ್ಲದೆ ಬದುಕುತ್ತಾನೆ ಎಂದು ಹೇಳುವುದು ಸಹ ಬೊಗಳೆ. ಮೇಲ್ನೋಟಕ್ಕೆ ಕೆರೆಗೆ ಏರಿ ಕಟ್ಟಿ ನೀರು ನಿಲ್ಲುವಂತೆ ತಡೆ ಒಡ್ಡಿದ್ದರೂ ಸಹ ಎಲ್ಲೋ ಒಂದು ಕಡೆ ಸಣ್ಣಗೆ ನೀರು ಹರಿದು ಹೋಗಲು ತೂಬು ಬಿಟ್ಟಿರಲೇಬೇಕಾಗುತ್ತದೆ. ಇಲ್ಲದೆ ಹೋದರೆ ಆ ಕೆರೆ ಏರಿ ಎಲ್ಲರೂ ನೋಡ ನೋಡುತ್ತಿರುವಂತೆ ಒಡೆದು ಹೋಗುತ್ತದೆ.

ವಿಶ್ವಾಮಿತ್ರ ಮಹಾ ತಪಸ್ವಿ – ಜ್ಞಾನಿ. ಆದರೆ ಮೇನಕೆಯ ಕಾಲ್ಗೆಜ್ಜೆಯ ನಾದಕ್ಕೆ ಮನಸೋಲಲಿಲ್ಲವೆ ? ಮೇನಕೆಯ ವಯ್ಯಾರಕ್ಕೆ ಸೋತ ಮಾತ್ರಕ್ಕೆ ವಿಶ್ವಾಮಿತ್ರ ಜ್ಞಾನಿ ಅಲ್ಲ. ತಪಸ್ವಿ ಅಲ್ಲ ಅನ್ನಲಾಗುತ್ತದೆಯೆ ? ಹಾಗಂತ ಕಂಡ ಕಂಡವರ ಮೇಲೆ ಮನಸ್ಸಾಯಿತೆಂದು ಅವರ ಮೇಲೆ ಏರಿ ಹೋಗುವುದನ್ನು ನಾನು ಸಮರ್ಥಿಸಲಾರೆ. ಆದರೆ ಮನುಷ್ಯನಲ್ಲಿ ಸಹಜವಾಗಿ ಕಾಮದ ವಾಸನೆ ಇದೆ. ಗಂಡು ಹೆಣ್ಣಿನ ನಡುವೆ ಕಾಮವೊಂದು ಇಲ್ಲದೆ ಹೋಗಿದ್ದರೆ ಅವರು ಪರಸ್ಪರರನ್ನು ಅಪ್ಪಿಕೊಂಡು- ಒಪ್ಪಿಕೊಂಡು ಮನೆ ಮಠ ಕಟ್ಟಿಕೊಂಡು ಇರುತ್ತಿರಲಿಲ್ಲ. ಹೆಣ್ಣು ಗಂಡುಗಳು ಸಂತಾನ ಬೆಳವಣಿಗೆ – ವ್ಯಕ್ತಗತ ಸುಖಕ್ಕೆ ಪೂರಕವಾಗಿ ಇರಲೇಬೇಕು.

ಆದ್ದರಿಂದ ಹೆಣ್ಣು ಗಂಡಿನ ನಡುವೆ ನಡೆಯುವ ಒಪ್ಪಿತವಾದ ಲೈಂಗಿಕ ಕ್ರಿಯೆಗೆ ಅಷ್ಟು ಪ್ರಾಧಾನ್ಯತೆ ನೀಡುವುದು ಎಷ್ಟು ಸರಿ ? ಹೆಣ್ಣು ಗಂಡಿನ ಮಿಲನೋತ್ಸವದಿಂದ ವ್ಯಕ್ತಿಯೊಬ್ಬನ ಚಾರಿತ್ರ್ಯ ಒಳ್ಳೆಯದು ಕೆಟ್ಟದ್ದು ಎಂದು ನಿರ್ಧರಿಸುವುದು ಹೇಗೆ ಸರಿಯಾದೀತು ? ಹೆಣ್ಣಿನ ಅಥವಾ ಗಂಡಿನ ಒಪ್ಪಿಗೆ ಇಲ್ಲದೆ ನಡೆಯುವ ಮಿಲನೋತ್ಸವಕ್ಕೆ ಕಾನೂನು ಕಟ್ಟಳೆ ಇದೆ. ಅದು ತನ್ನ ಕ್ರಮವನ್ನು ತೆಗೆದುಕೊಳ್ಳುತ್ತದೆ. ವ್ಯಕ್ತಿಯೊಬ್ಬನ ತಪ್ಪು ತಪ್ಪೆಂದು ಕೋರ್ಟ ಹೇಳುವುದಕ್ಕಿಂತ ಪೂರ್ವದಲ್ಲಿಯೆ ಆತನ ಮಾನ ಹರಾಜು ಹಾಕುವುದು ಎಷ್ಟು ಸರಿ ? ನಾವೆಲ್ಲ ಈ ಬಗ್ಗೆ ಮುಕ್ತವಾಗಿ ಆಲೋಚಿಸಬೇಕಾಗಿದೆ. ‘ನಂಬಿದ ಹೆಂಡತಿಗೆ ಗಂಡನೊಬ್ಬ ಕಾಣಿರೋ’ ಎಂಬ ಮಾತು ನೂರಕ್ಕೆ ನೂರು ಒಪ್ಪಿತವೆ. ಆದರೂ ಆಕಸ್ಮಿಕವಾಗಿ ಕುದುರಿದ ಒಲುಮೆಯ ಕೂಟಕ್ಕೆ ಯಾವ ದೊಣ್ಣೆ ನಾಯಕನ ಅಪ್ಪಣೆ ಬೇಕು ?

ಈ ಕುರಿತು ನಾಗರಿಕ ಸಮಾಜ ಸೃಷ್ಟಿಸಿರುವ ವಿಧಾನ ಸೌಧಗಳು, ಸುಪ್ರಿಂಕೋರ್ಟ, ಹೈಕೋರ್ಟಗಳು, ಧಾರ್ಮಿಕ ಕೇಂದ್ರಗಳು, ಚಿಂತಕರು ಮುಕ್ತವಾಗಿ ಚರ್ಚಿಸಬೇಕಿದೆ. ಮುಕ್ತವಾದ ಮನಸ್ಸು ಸಮಾಜವನ್ನು ಚಲನಶೀಲಗೊಳಿಸುತ್ತದೆ. ಮೃತ ಮನಸ್ಸು ತನ್ನ ಸುತ್ತ ಮುತ್ತ ರೋಗಕ್ರಿಮಿಗಳನ್ನು ಸಾಕುತ್ತದೆ ಎಂಬ ಮಾತನ್ನು ನಾನಿಲ್ಲಿ ಜ್ಞಾಪಿಸಿ, ಈ ಬಗೆಗಿನ ಚರ್ಚೆಗೆ ಮುನ್ನುಡಿ ಬರೆಯುತ್ತಿರುವೆ. ಆಸಕ್ತ ಬರಹಗಾರರು ಪ್ರತಿಕ್ರಿಯೆಯನ್ನು ನೀಡಬೇಕು. ಸಮಾಜದಲ್ಲಿ ಉಂಟಾಗಿರುವ ಉಂಟು ಮಾಡುತ್ತಿರುವ ಮಾಧ್ಯಮಗಳ ಡೊಂಬರಾಟವನ್ನು ನಿಲ್ಲಿಸಬೇಕಿದೆ.

0 ವಿಶ್ವಾರಾಧ್ಯ ಸತ್ಯಂಪೇಟೆ